सहिद लखन गाउँपालिकाको आर्थिक वर्ष २०८१/८२ को वार्षिक समीक्षा कार्यक्रम आज मिति २०८२।०४।१६ गते गाउँपालिकाको बहुउद्देश्यीय सभाहलमा सम्पन्न गरियो। यस कार्यक्रमको अध्यक्षता गाउँपालिकाका अध्यक्ष श्री रमेश बाबु थापा मगरज्यूले गर्नुभएको थियो र कार्यक्रममा गोरखा जिल्ला समन्वय समितिका उपप्रमुख श्री लिला परियारज्यू प्रमुख अतिथिको रूपमा उपस्थित हुनुभएको थियो। साथै कार्यक्रममा गाउँपालिका उपाध्यक्ष श्री इन्दिरा तिवारीज्यू, गाउँपालिकाका प्रमुख प्रशासकीय अधिकृत श्री बाबुराम मगरज्यू, १ देखि ९ नं वडाका वडा अध्यक्षज्यूहरू, गाउँ कार्यपालिका सदस्यज्यूहरू, शिक्षा समितिका सदस्यज्यूहरू लगायत गाउँसभा सदस्यज्यूहरू, गाउँपालिका अन्तर्गतका राजनीतिक दलका प्रतिनिधिज्यूहरू, पत्रकारहरु, गाउँपालिकाका विभिन्न शाखा प्रमुखज्यूहरू तथा कर्मचारीहरूको उपस्थिति रहेको थियो।
कार्यक्रमको मुख्य आकर्षणको रूपमा सम्पूर्ण कार्यालयहरूका वार्षिक प्रगति प्रतिवेदन सम्बन्धित वडा कार्यालय प्रमुखज्यूहरू, मनकामना आयुर्वेदका प्रमुखद्वारा प्रस्तुत गरिएको थियो। त्यसैगरी, गाउँपालिकाका सम्पूर्ण शाखा प्रमुखज्यूहरूले आ-आफ्नो शाखाको वार्षिक प्रगति विवरण प्रस्तुत गर्नुभएको थियो, जसले गाउँपालिकाको समग्र विकासको परिदृश्य प्रस्तुत गरेको थियो।
कार्यक्रममा प्रस्तुत गरिएका प्रतिवेदनहरूमाथि छलफल तथा अन्तरक्रिया सम्पन्न गरिएको थियो, जसमा उपस्थित सम्पूर्ण महानुभावहरूले आ-आफ्नो विचार, सुझाव तथा प्रतिक्रियाहरू प्रस्तुत गर्नुभएको थियो। यस अन्तरक्रियाले गाउँपालिकाको विगत वर्षको कार्यसम्पादनको समीक्षा गर्नुका साथै आगामी वर्षका लागि रणनीतिक योजनाहरू तर्जुमा गर्न महत्वपूर्ण योगदान पुर्‍याउने छ।
यस कार्यक्रमले गाउँपालिकाको सुशासन, पारदर्शिता र जवाफदेहिता सुनिश्चित गर्न महत्वपूर्ण भूमिका निर्वाह गरेको छ। साथै, यस कार्यक्रमले स्थानीय सरकारको कार्यप्रणाली र विकास प्रक्रियालाई अझ बढी प्रभावकारी र जनमुखी बनाउन योगदान पुर्‍याउने अपेक्षा गरिएको छ। समग्रमा, यो वार्षिक समीक्षा कार्यक्रम सहिद लखन गाउँपालिकाको समग्र विकास र सुशासन प्रवर्द्धनको दिशामा एक महत्वपूर्ण कोशेढुंगा सिद्ध हुने विश्वास गरिएको छ।